變「阿婆殺手」被圍索合照　黎諾懿康華落區向長者送暖

2021-04-11 19:00

黎諾懿與康華昨晨應慈善組織「有艇搭」邀請，跟一眾義工及「深水埗明哥」陳灼明，到粉嶺向250名低收入長者派發物資，當中包括大米、豉油、麥皮、蝦子麵、消毒搓手液等。雖然全程戴口罩，但形象入屋的兩人仍被認出，老友記們還紛紛索合照，令諾懿瞬間成為「阿婆殺手」！

黎諾懿的寶貝仔黎峰睿（小春雞）前日4歲生日，雖然昨日要出席囝囝的慶生派對，但熱心公益的諾懿也冇托手踭，答允出席昨晨舉行的送暖活動。過去出錢又出力他都非常「熟手」地派米，其間還被不少老人家認出，諾懿亦來者不拒，跟婆婆們逐一合照兼送上祝福：「身體健康，開開心心！」冧到一班婆婆笑逐顏開。

至於一直照顧年邁患病父母的康華，也特別關注有需要的長者，首次親身派物資的她說︰「好開心能夠幫助到老人家，我覺得好有意義。聽到佢哋不停講多謝，又同我哋傾偈，佢哋話有睇我哋嘅節目，好似見到識嘅人咁，讚我同諾懿真人好瘦，好有親切感，都希望佢哋身體健康。」康華直言打算下次自掏銀包，買藥油及其他食物給老人家，「我最開心係聽到長者話畀咁多嘢佢哋，今日好多人冇拎袋，我覺得下次可以準備啲袋同多啲家庭用品畀佢哋。我覺得老人家特別需要人照顧，我哋應該多啲關心佢哋，尤其有啲老人家行動不便，係好需要送多啲暖。」而活動後，諾懿亦即一盡好爸爸責任，駕車趕赴金鐘出席小春雞的生日Party。