【獨家】搵黎諾懿介紹信得過「筍盤」高海寧堅持唔靠男人靠自己

2021-02-05 00:10

由五年前《愛回家》開始，現已變身「美食達人」嘅黎諾懿跟34D「咪神」高海寧(高Ling)係受歡迎組合，所以明晚(周六) 11時TVB播出嘅《big big shop今晚請客慶團年》再搵嚟兩人拍住上，以優惠價推銷賀年產品。諾懿對好拍擋高Ling讚不絕口，後者即叫他介紹「筍盤」，但一定唔要假桃花及爛桃花，強調：「唔好嘥我時間！」採訪：方騫平

上周黎諾懿及高海寧喺節目中介紹上海名菜烤麩，高Ling說：「上海人注重意頭嘢，烤麩即係『靠夫』，喻意老公喺新一年可以愈來愈好！」諾懿笑住寸她：「唔怪得我老婆成日叫我食，但你仲食？」高Ling扁晒嘴反駁：「我靠自己。」高Ling事後話係自己嘅心聲：「我性格獨立，從來都係靠自己。」

諾懿讚高Ling零缺點
　　
黎諾懿對高海寧評價好高，猛話她樣靚身材正，口齒伶俐兼善解人意，好錫身邊朋友，願意花時間喺朋友身上，而且入得廚房出得廳堂，識煮飯嘅人係會加分嘅，他自爆說：「好似我咁，當年用廚藝嚟吸引老婆，有次煮咗佢最愛嘅星洲胡椒蟹，佢開始發覺我嘅好處，之後食完一道菜又一道，一直食到𠵱家。」

五億駙馬最後靠自己
黎諾懿好感恩成為「疫境廚神」，喺咁艱難環境為自己開拓咗一條新路：「當年被指『五億駙馬』，我堅持希望用行動改變大家亦留返畀大家慢慢睇，就算點講都冇用，𠵱家創出一片天嚟照顧到家人。」至於34歲，回復單身嘅高Ling希望今年有更多好劇集，唔心急拍拖：「等諾懿兩公婆慢慢幫我篩選，搵到好嘅先彈畀我啦！」