ANSONBEAN私下加操練舞 鄭欣宜首合作大讚very very good

ANSONBEAN獲安排與師姐鄭欣宜（Joyce）合作新歌《@princejoyce (featuring ANSONBEAN)》，首次合作的ANSONBEAN極具誠意親到拍攝現場探師姐班，且在一旁靜靜偷師。ANSONBEAN說：「可以同Joyce合作真係好開心！雖然我同Joyce分開拍，但Joyce拍攝果日我都有去探班，不過我只係買咗啲香蕉畀佢，幫佢打吓氣。我一去到已經俾個好靚好壯觀嘅景嚇親，再見到著住套好靚舞衣嘅Joyce，佢手上的水晶長指甲又好靚，襯起佢好靚好型，搞到我望住佢都有少少緊張，所以只係敢同佢講叫佢加油呀！」

ANSONBEAN平時喜歡跳跳紥但其實非常勤力好學，當一知道要在新MV中演出便立即私底下加操練舞，他説：「MV隻舞唔係好複雜，拍之前兩日開始學，之後我睇住Joyce個MV私底下練咗一日，所以拍攝時大家都滿意我表現，公司同事讚我學得快，其實係我秘密苦練將勤補拙。」

第一次正式入錄音室錄個人作品的ANSONBEAN說：「剛開始錄歌時我係有啲緊張，之後就進入狀態放膽咁唱，嘗試花啲心思放多啲自己嘅方法入去，又試吓扮厚啲聲扮大隻佬咁唱，搞到好似演戲咁花功夫。」

師姐Joyce又如何評價小師弟的表現呢？Joyce說：「我同公司都覺得ANSONBEAN好啱呢啲跳舞節奏嘅歌，咁《@princejoyce》呢首歌就啱晒啦，佢嘅表現亦都very very good！」