【處男戰】晒「谷肌」戰績被嘲冇料到　林作下月挑戰首場公開拳賽

林作與百億富三代鍾培生的「林鍾一戰」落實於9月18日假九展Star Hall舉行，面對2018年開始參加拳賽的鍾培生，完全零經驗的林作都積極備戰，找來前世界冠軍向柏榮教授拳擊。至今特訓約1個月，林作不時於社交網分享練拳花絮和成果，繼昨日貼出赤膊晒紅印照後，自稱日日除了見客就是練拳的他，今日下午又一連出了兩個Po，宣佈將於下月1日參加某金融集團舉辦的男子業餘組67Kg拳賽，林作寫道：「為盡快熟悉拳賽，本人已報名5月1號參加人生第一場公開賽。我做嘢，一係唔做，一係就去到盡。歡迎黎（嚟）買飛入場睇我處男戰。」

至於另一個Po，林作上載了一張半裸對比圖，他表示：「幾個禮拜而已。」相中，疑於3日前曝光過的左圖中，林作一頭汗水、露晒格甩底毛及雙下巴；而疑於上月初曝光過的右圖中，他雙手緊握拳頭，擺出「谷肌」Pose，可惜好似都冇乜效果，跟左圖一樣胸腹依然得一團肉，令到一眾網民都好疑惑邊張係Before、邊張係After，大家仲抵死留言：「左邊定右邊係新架？」、「老實講句，有咩分別...？」、「有戴眼鏡同冇戴眼鏡」、「膚色黄啲定白啲嘅分別，有冇美肌咁解」、「乳頭黑咗」、「點解練極都咁細隻，你咁唔掂喎」、「呃埋自己係最高境界」等，認真爆笑！其實放大張相再仔細睇一睇，左圖中的林作腹部確實收緊咗少少，不過腰間「車軚」仔仍然健在，睇嚟要操出肌肉都仲有一條漫長的路。

此外，鍾培生今日也於IG Story貼出與教練的合照，以及一條獨自對鏡揮拳練習的片段，他寫道：「4個rounds點夠，no bullshit let's go。」即使跟他口中所講其遇過「最弱的對手」對打，鍾培生都冇鬆懈過，密密進行訓練。