【封肚？】產後專心湊3個囝囝　胡杏兒：我諗都要收山喇

2021-04-06 14:57

胡杏兒今日於社交網宣佈三子李奕宏（Liam）出世了！事後回覆傳媒時，她先多謝各界祝福，透露B仔於復活節前已出世，杏兒笑言：「因為係第三個（囝囝），所以都好忙，等返到屋企先同大家公佈，佢都好重，冇諗過佢咁重，成8磅幾，係順產嘅，生佢都少少辛苦，因為佢都好大隻。」並謂囝囝的中英文名均由老公改，而Phil今次也有陪同入產房，過程一切順利。

問到Liam似邊個？杏兒說：「我覺得佢似大哥哥同二哥哥嘅混合體。」至於特意選在今午13:14（一生一世）時段於社交網公佈喜訊，她笑稱只是巧合而已，並非BB出生時間，杏兒續道：「希望BB健康快樂。（再追囡囡？）我諗都要『收山』喇，因為3個都要時間照顧、陪伴、教導，其實男女都冇所謂，最緊要健康。」她又指兩位哥哥Brendan和Ryan見到細佬Liam都好開心，亦覺得好新奇，「佢哋爭住去錫細佬、睇細佬，而家BB都好乖，好易湊，多謝大家關心。」