【維港會】杜汶澤嘲「林鍾一戰」如小丑打交 鍾培生反擊暗諷《喱騷》做唔住

鍾培生和林作的百萬擂台拳賽將於9月18日在九展舉行，有傳門票最貴高達3萬元。杜汶澤於社交平台上轉發相關新聞，嘲諷兩人似「小丑打交」，其後鍾培生發千字文反擊，杜汶澤的太太田蕊妮及後亦加入戰場，三人於社交平台上隔空開火，火藥味甚濃，有網民就笑言第二場的擂台戰似乎已經翻起暗湧。

事緣於杜汶澤在facebook分享「林鍾一戰」的相關新聞，並寫道：「有多餘錢，你會去睇有誠意嘅《一秒拳王》，定還是小丑打交？三萬蚊？過夜呀？你估你係雞呀？」

鍾培生隨即發千字文反擊，指並非「小丑打交」，而是慈善企業家打小丑，「首先多謝杜汶澤先生關注，唔係小丑打交，係慈善企業家打小丑」，「外場地座位價錢表一律未安排，同埋所有嘅收益都會放入Derek.Love 善學同微笑行動，活動亦都會係不計成本去製作同宣傳，絕對唔會收咗人錢，Server hang機，有人俾人呃錢買飛等等問題出現」。隨後鍾培生更提到杜汶澤所設立的OTT平台《喱騷》，舉出一系列數據來批評，聲稱與朋友商討後，要給予阿澤意見及要處理的問題，「因為佢個show成功，有好多friend叫佢『我哋一齊搞個平台啦，TVB無㗎啦！』咁佢Ego大就去試，戇XX輸X死佢呀。」

杜汶澤再發文與鍾培生隔空開火，更粗口連篇怒罵鍾培生「含着金鑰匙出生」，靠「父幹」上位，「我檔嘢好唔好生意使話你知呀？你開個嚟睇吓，睇下有冇人幫襯你啊！你點先證明到叻過我呀？你要死咗佢，跟住再投胎，一出世好似我咁窮，然後白手興家，咁先證明到嘅！明唔明呀！」，他更續罵鍾培生愛博出位，「呢個世界唔係個個有資格做明星嘅，但係人人都有機會紅！你咁鍾意博出位，話俾你聽你而家紅梗啦，因為依家我降級X你！你就一定紅！」

杜汶澤的太太田蕊妮撐夫心切，於Facebook加入罵戰，以「自稱慈善企業家」揶揄鍾培生，並稱《喱騷》的節目重質不重量，大贊老公有勇氣及行動力，更在文末預祝「林鍾一戰」大賣兼唔會輸。