【獨家】嫌陳奕迅面燶　頻搵人夫慰解　徐濠縈一見KB心花怒放

新冠肺炎衝擊各行各業，去年稱全年拍得一個廣告的「樂壇吸金王」陳奕迅（Eason）也笑言患上「荷包乾硬化」和「急性發錢寒」，幸光棍節終為內地一個晚會演出，盛傳他唱三首歌袋180萬人仔（約214萬港元）！但開心時間過得快，早前本港再爆發第四波疫情，Eason都要一改策略於網上開Live唱歌、吹水宣傳新歌，惜Stay home時間多咗都唔願陪老婆徐濠縈（阿徐），即使前排被影到做「柴可夫」車對方去買外賣，他全程面燶燶，無癮的阿徐只好搵人夫KB（李健宏）解悶。早前落銅鑼灣巡鋪的她，本來勁𤷪𤺧，一見到KB即化身少女揈晒手，仲Keep住笑到瞇晒眼，未傾飽的兩人過幾日又孖住去大坑食大排檔，約得仲密過老公！好在本月初47歲生日，阿徐仲有囡囡康堤為她炮製愛心早餐，畀番啲家庭溫暖！採訪：張詠森、梁志明

近來無需跑台、出Event的陳奕迅，頻頻於社交網出Po宣傳新作外，私下都似乎冇乜搞作，仲長期匿屋企，都唔願陪太太徐濠縈出街過二人世界，搞到阿徐唔係一個人踩板，就成日黐住同樣愛滑板及Wakesurf的KB。早前下午5時許，《頭條日報》影到阿徐獨自現身位於百德新街的自家潮店HER，一身「迷人Pink Lady」Look的她雙手插袋，一臉唔耐煩地向員工狂呻，未幾KB殺到，阿徐秒速「變臉」笑晒口，仲跟對方來個愛的抱抱。在店內買完凍飲後，KB便留低陪阿徐吹足45分鐘，其間阿徐忽然變少女，一時掩嘴笑，一時又開心到揈晒手，一對「笑眼」從此冇擘大過，直至各自上車返屋企。

密密約見
事隔數天的下午2時許，阿徐再駕車到大坑會合KB，原來二人相約踎街邊食大排檔，着住件貴婦白色毛毛褸的她與KB坐在路邊大啖食碟頭飯，超啱嘴形的他們一邊扒飯一邊傾，講足30分鐘都嫌未夠喉，結果埋單後，兩位潮人又走到後巷一齊打住「邊爐」再吹過！呼吸完，阿徐轉身即刻戴番個口罩，待KB都吸完口煙就行去拎車，途中阿徐終於發現有記者在場，她笑一笑向KB示意指一指，對方即禮貌地向鏡頭揮手，然後齊齊上女方坐駕離開。