【獨家】產後急復工誓做在職媽咪　譚凱琪捱眼瞓見證B女成長

譚凱琪（Zoie）於無綫劇《失憶24小時》跟郭晉安（安仔）飾演分居夫婦，跟角色一樣，Zoie去年10月也升呢人母，為老公莊日宇誕下女兒Gabri。談到坐月的兩個月最辛苦，她指餵B、換片無限Loop真係做到踢晒腳，幸有老公幫手湊女，讓她半夜可唞唞，「雖然少咗自己時間，但見住BB一日一日長大，係開心嘅。」事業心重的她表示會繼續拍劇，「好多在職媽媽都好犀利，人哋做到我都做到。」撰文：黎寶倫　攝影：譚壹致　髮型：IG@Match_megatron2222

由於在劇中要狂鬧郭晉安，譚凱琪直言開拍前已代入角色，講嘢粗鄙又頻頻向老公發炮，「因為熟嘛，嗌交係生活小情趣，但講完自己意見轉頭就冇事，最緊要坦誠，唔好有咁多Cheating，所有嘢我都好鍾意同先生分享，我都欣賞佢有嗰句講嗰句。」至於可有為湊B起爭拗？Zoie指夫婦倆的育兒方法少不免有些出入，但雙方會商量及請教醫生，「生完真係感受到養兒一百歲長憂九十九，由BB出世開始就擔心、為佢未來十年鋪排，我已經算好遲，而家仲未報學校，一來疫情，二來因應囡囡性格去揀學校，我都唔想迫得太緊。」

兩年後再追B
忙湊女的Zoie即將開拍《十八年後的終極告白2.0》，她說：「而家好方便，可以電話視像，希望BB唔好唔記得我啦，返到去唔畀我抱就會好傷心。」可擔心錯過BB翻身、爬行等時刻？她稱今次開工時間尚可，笑言寧犧牲休息時間都要見證囡囡的Special moment，「我盡量自己幫佢沖涼，因為到佢大咗就唔係咁，要珍惜，好多時自己都親力親為。（怕之後黐爹哋？）都好嘅，老公成日話BB見到我開心好多，畀啲時間佢哋相處吓啦。」並謂即使做了媽咪也不會放棄事業，但絕不分薄時間照顧家庭，而追B就要待兩年後。