【独家】产后急复工誓做在职妈咪　谭凯琪捱眼瞓见证B女成长

谭凯琪（Zoie）于无綫剧《失忆24小时》跟郭晋安（安仔）饰演分居夫妇，跟角色一样，Zoie去年10月也升呢人母，为老公庄日宇诞下女儿Gabri。谈到坐月的两个月最辛苦，她指喂B、换片无限Loop真系做到踢晒脚，幸有老公帮手凑女，让她半夜可唞唞，「虽然少咗自己时间，但见住BB一日一日长大，系开心嘅。」事业心重的她表示会继续拍剧，「好多在职妈妈都好犀利，人哋做到我都做到。」撰文：黎宝伦　摄影：谭壹致　发型：IG@Match_megatron2222

由于在剧中要狂闹郭晋安，谭凯琪直言开拍前已代入角色，讲嘢粗鄙又频频向老公发炮，「因为熟嘛，嗌交系生活小情趣，但讲完自己意见转头就冇事，最紧要坦诚，唔好有咁多Cheating，所有嘢我都好锺意同先生分享，我都欣赏佢有嗰句讲嗰句。」至于可有为凑B起争拗？Zoie指夫妇俩的育儿方法少不免有些出入，但双方会商量及请教医生，「生完真系感受到养儿一百岁长忧九十九，由BB出世开始就担心、为佢未来十年铺排，我已经算好迟，而家仲未报学校，一来疫情，二来因应囡囡性格去拣学校，我都唔想迫得太紧。」

两年后再追B
忙凑女的Zoie即将开拍《十八年后的终极告白2.0》，她说：「而家好方便，可以电话视像，希望BB唔好唔记得我啦，返到去唔畀我抱就会好伤心。」可担心错过BB翻身、爬行等时刻？她称今次开工时间尚可，笑言宁牺牲休息时间都要见证囡囡的Special moment，「我尽量自己帮佢冲凉，因为到佢大咗就唔系咁，要珍惜，好多时自己都亲力亲为。（怕之后黐爹哋？）都好嘅，老公成日话BB见到我开心好多，畀啲时间佢哋相处吓啦。」并谓即使做了妈咪也不会放弃事业，但绝不分薄时间照顾家庭，而追B就要待两年后。