【集體回憶】《尋秦記》電影版預告曝光　古天樂林峯相隔廿年再對決

由古天樂（古仔）、林峯、宣萱和郭羨妮等主演的經典TVB劇《尋秦記》，相隔20年後再次原班人馬以電影版回歸！電影公司今日於線上「香港國際影視展」發佈多張《尋》片劇照，以及首條預告片，從預告中看到，飾演「項少龍」的古仔穿上T-shirt、孭住斜孭袋，穿越到古代與「嬴政」林峯矛盾角力，鏡頭一轉，兩人一個揸槍、一個拔劍互相對決，背景音樂隨即響起主題曲《天命最高》，滿滿的童年回憶即刻返晒嚟！

今次項少龍要帶住一家人逃難，其中見到有「烏廷芳」宣萱、「琴清」郭羨妮、「善柔」滕麗名，以及新加入的張繼聰、朱鑑然和陶枳樽等。片中，古仔說：「你可唔可以放過我一家人？」林峯回應：「如今係你家鄉嘅人唔放過寡人，你仲有當寡人係徒弟咩？」更揚言所有恩怨從此了斷，令人期待兩人的對手戲！對演員而言，古裝戲最花時間是化裝和梳髮，今次他們每天要花接近3小時梳化才能開始拍攝，但大家都不介意並表示：「回憶返晒嚟！」

此外，根據官方劇情簡介，由吳炫輝和黎震龍執導的《尋秦記》，講述一場多年前的冤獄，引發改變歷史的危機！Ken誓要回到古代成皇，以彌補因冤獄而失去的人生。身在秦朝的項少龍一家雖歸隱園，無奈一舉一動仍被徒弟秦王嬴政盡收眼底；正當嬴政一統六國，以為平定天下之時時竟碰到Ken的突襲，他不得不去尋找又敬又畏的師傅，這對師徒久別二十年終於再次碰面，加上穿梭時空誓要改變歷史的Ken，三人必令秦朝再起風波，改寫命運。究竟Ken又係邊個呢？