【係愛呀】宣布婚訊首度現身 李施嬅有信心型男未婚夫夠專業唔會撻著學生
2021-03-15 20:32
上月初突爆婚訊的李施嬅，仲驚爆未婚夫原來係身形健碩嘅靚仔星級健身教練車崇健（Anson Cha），周潤發、郭富城、楊千嬅、吳鎮宇、關智斌等都係他學生。今日李施嬅容光煥發，首度出席時代廣場舉行嘅展覽活動，她透露因疫情關係，雙方家人未能飛到香港，故要視乎疫情才能籌辦婚禮，亦未註冊，但不介意等到明年才完婚，反正大家處於半同居狀態，早已認定對方是終身伴侶。
老公唔鍾意懶人呢世都要勤力
她開心說：「我拍戲已經結過好多次婚，搞唔搞婚禮冇所謂，最緊要家人開心，爸爸最近好開心，我宣布婚訊後到家姐宣布喜訊，佢婚期比我更早！」施嬅與車崇健由朋友介紹，大家秘戀4年，只得十個八個朋友知情，她冧爆說：「佢簡單、細心、上進兼勤力，男友鍾意我叻同埋勤力，佢唔鍾意懶人，所以我呢世都要勤力，否則怇就唔愛我喇！」她又勁讚Anson係香港最叻嘅教練，有好多學生，但畀啲空間佢，唔好講太多，更唔回應未婚夫係咪KOL車志健弟弟，惟一可以講：「佢好專業，唔會撻著學生，而我唔係佢他學生，只會間中指點我一吓，如果由佢嚟教我，可能我哋會嗌交。」
爆男友海底求婚浪漫又有心思
施嬅憶述男友正式求婚一次，她就Say Yes：「因為我鍾意海洋，我哋喺美國潛水時，佢好有心思咁喺海底求婚，戴上戒指時仲有鯊魚。」她又解釋早已想宣布婚訊，但男友是圈外人，擔心嚇怕對方，又笑說：「宣布婚訊後，男友去茶記食飯被食客恭喜，佢好怕醜，面都紅埋，𠵱家佢比我紅！」
生兒育女順其自然唔刻意強求
至於會否勤力「造人」？她自言喜歡小朋友，但順其自然，不刻意，現在先玩陳山聰個仔，自己的，有就有、冇就冇囉！
最新回應