【獨家】環星娛樂牛年開turbo搞騷 張國林為張偉文舉行個唱籌生活費
2021-02-26 00:23 
初四係開工吉日，「環星娛樂」老闆張國林率旗下歌手出席公司新春團拜，齊齊「撈起」及切燒豬。提到演唱會喺疫情下停頓咗一年，眼見疫情受控，張國林嗱嗱聲開turbo搞show，由「靚聲王」張偉文打頭炮開4場，讓他賺點生活費維生；9月就搞陳美齡個唱，回顧她昔日佳作。 採訪：方騫平 攝影：譚壹致
當天「環星唱片公司」相當熱鬧，除咗旗下歌手尹光、何婉盈、康華、張子丰、方俊及歌莉雅出席外，黃翊、敖嘉年、李日朗等亦聚首一堂，由老闆宣佈喜訊，包括今年會為尹光、楊立門、柳影虹、Joe Junior、葉振棠開騷，而莫旭秋及姜蓓莉除開演唱會，下月同時推出《雙雙對對》唱片。
陳美齡如願開周年騷
由於《張偉文演唱會DVD豪華紀念套裝》大賣，張國林食住個勢宣佈喺5月為他舉行個唱：「佢做完兩次腰椎大手術後狀況時好時壞，要入住養老院靠輪椅代步，知佢環境艱難，所以幫佢開Show。」𠵱家張偉文體重暴跌到只有80幾磅，坐喺輪椅度驚見「筷子腳」，張國林指他狀態OK，可以應付到演出，之前仲喺食店入面拍咗新春恭賀片段，着住紅色褸，精神奕奕，面口都回復飽滿！至於今年係陳美齡(Agnes) 入行50周年， 一直恨開周年演唱會的她終能如願， 9月喺文化中心舉行回顧Show。另「環星唱片」為咗支持「音樂永續槳壇共享計劃」，3月份推出唱片《音樂傳盛》，翻唱《心淡》嘅黃翊去年同康子妮傳出緋聞，他強調牛年唔怕惹是非：「有時飛來橫禍好難講，都唔理得咁多。」
最新回應