【維港會】獲敷衍覆訊息港婦嘆疏遠當眾痛哭 網民勸朋友如浮雲

隨住年歲漸增難免看透人情冷暖，有女網民稱獲昔日好友敷衍回覆手機訊息，嘆朋友一個個離她而去，在餐廳當眾痛哭，令其他網民安慰道人情如浮雲。

女事主在「親子王國」討論區內發文，指忍不住在餐廳哭泣，「認識多年的朋友依家回覆我WhatsApp都只係比一個emoji（表情符號）我。（我）依幾年keep住大時大節問候，但佢已經唔想再理我。」，而「另外兩位朋友移民，走咗先知，食飯冇叫我」

女事主自言對朋友好好，但不知為何關係永遠不能維持，「但每次佢哋一對我做壞事如無啦啦閙人，我心情就會跌落谷底，起唔返身，不斷問點解咁對我」。 她引述醫生指她很重視別人看法，經常想事事完美，「所以對方一有問題，我就會成個人鑽牛角尖。我好唔開心，我已無晒朋友，一唸起又想喊，好孤單」。

她透露，「其中一位朋友，佢老公叫我幫佢買結婚戒指，佢老公搵我話怕埋單唔夠錢我都即刻借比佢，但戒指錢冇還過。好友當日結婚冇姊妹，我跪足一日幫佢整婚紗尾。到頭來比佢閙一句」。女事主慨嘆，「接受唔到、唔明點解要咁對我。我都唔想成日唸，但控制唔到，真係我本人嘅問題?自己太熱情太熱血?事事拍心口但又接受唔到別人嘅一句說話」。

有網民留言安慰道，「無需要為別人冷淡對待自己而難過! 有責任善待你嘅只有你自己! 太注重人哋點對你其實好容易受傷! 做朋友講缘份，親人亦然! 無需要將自己嘅喜怒哀樂交托別人! 下下要諗人哋點解咁對自己會好攰，做人要活得自在，獨處又何妨，你嘅人生唔係要取悦任何人!」、「君子之交淡如水，之前我都重視朋友，現在不會了，不過仍然保持助人的心態！樓主可以培養興趣，人生唔係得朋友架，以前未有疫情，我收工成日行街、去做facial、上堂，生活有寄托就唔會孤單啦！」

有人奉勸不要在意，「朋友如浮雲，自己先係最重要。只覆你emoji? 以後唔會搵佢。唔搵你食飯？以後唔使聯絡。」、「好明顯佢地冇當你系朋友，清醒吧！必因為咁而唔開心，質疑自己。」

有人指，「我都好怕這類朋友，太過重友情，又要求自己點、要求自己點，太辛苦了」、你講出咗個問題，太熱血。學一句：君子之交淡如水。太熱血反而令人透唔到氣，學識下拒絕同冷漠，保護自己」

有過來人亦有感受，「我最好朋友有事，只有我肯借錢比佢，但佢豪食玩買有錢唔還仲話我，最後佢還晒錢同我絕交。咁又如何，算吧啦，當前世欠佢。」