【維港會】購300多呎居屋散盡積蓄 人妻憂供到70歲難抵壓力

樓價長年高企下一個個小市民置業都充滿辛酸，有新晉業主更因壓力太大而懷疑自己有情緒病。

有網民在討論區發文，去年夏天成功上車，買入剛30年的居屋屋苑，由於無「父母幹」，薪水不高，全靠她與先生租樓多年後勉強上車。

但她自言覺得好荒謬，只是30年300多呎的舊居屋，卻用上畢生積蓄，「樓按係用盡所有身家之後，仲要供到70歲先供完，最好60歲後一個文員仔唔好俾人抄，否則我都諗唔到點算」。

她慨嘆，由於已用上筆生金錢，又擔心目前工作不穏定，心理壓力好大。而且樓齡又頗高，新居有少少問題例如少許滲漏、入水等都好緊張，一直情緒好差，「覺得好似SHOW HAND ALL IN 咁，有啲咩事就一舖清袋，覺得付出咗咁多都唔能夠『安居』，我覺得我已經有啲過度焦慮症，好少問題已經覺得好煩」。

她回想過去租樓，「唔鍾意咪搬囉，心理壓力無咁大。我明白買樓係財務安排上有一定的好處，但上咗車之後心理壓力同情緒又係另一回事。」

有網民就安撫說，「你再租多幾年樓，你就知道你今日咁諗係幾蠢嘅事，買樓，點都係自己嘅」、「其實自己有能力上車，巳經比起好多人幸福，不如將精神放回點樣可以將間屋整得靚啲、舒服啲，享受一下自置物業既心態仲好啦。」

也有首置客說，「我都有共嗚，我都all-in晒，冇父幹!我仲慘，單身，自己一個供。不過我平時都唔係消費主義嘅人，撐得住嘅!大家都係上車但求有個安樂窩加少少資產增值咁啫，最緊要問心無愧就得喇，共勉之!」

有人抱怨，「仲有啲公司知你買咗樓，大把說話你聽，日日恐嚇你，所以心理壓力一定有」。亦有人直指，「業主的確唔係個個做得起，勉強自己冇幸福，如果覺得租樓生活啱自己多啲，何必夾硬做業主」