【韓星齊玩雪】防彈RM同雪鴨組「DTS」 Jennie 瑟琪雪中興奮彈彈跳

2021-01-07 16:00

韓國近日天氣寒冷，今日首爾的最低氣溫更只得零下19度，凍到打冷震之餘仲要落大雪！雖然香港冇機會見到落雪景象，疫情下亦冇辦法出國感受落雪，不過睇住一班韓星玩雪玩得咁開心，惟有睇咗當去咗啦。

RM@防彈少年團
防彈少年團隊長RM雖然冇Post出自己嘅相同片，不過一啲都唔輸蝕，佢用雪整咗7隻工整嘅鴨仔，再一字排開。RM更留言指鴨仔們係「DTS」，即係鴨仔版嘅防彈少年團，連玩雪都慣住一班隊友，呢位隊長真係好Warm呀。

Jessica
少女時代出身嘅Solo歌手Jessica Post出身處瑞士嘅舊相，藍天白雲加埋雪山景真係無敵。Jessica搞笑表示好掛住《魔雪奇緣》嘅雪人Olaf，更在限時動態用一張Olaf嘅GIF圖就話對方「嚟咗」，有睇完相當自己去咗旅行嘅Feel喎。

Jennie@BLACKPINK
BLACKPINK嘅Jennie喺一片好厚嘅雪地上影相，頭頂有飄雪好浪漫，唔知佢係咪搵到隱世雪地呢，竟然只得Jennie留下嘅幾個足印！平時喺舞台上夠晒霸氣同Cool嘅Jennie，見到落雪都開心到彈吓彈吓，反差夠晒可愛。

瑟琪@Red Velvet
同舞台上好大反差嘅仲有Red Velvet嘅瑟琪，佢都忍唔住喺雪地彈吓彈吓，仲開心到轉咗個圈，除此之外佢仲影到一張雪花大大片飛落嚟嘅靚相。貼心嘅瑟琪更留言提醒大家小心雪地，人靚心更靚。

姜丹尼爾
限定男團Wanna One出身嘅Solo歌手姜丹尼爾就拍咗個小小嘅Vlog。佢先表示外面落大雪，鏡頭一轉姜丹尼爾已經換好禦寒衣物，親身上陣話要教大家整雪天使喎！原來大字形瞓喺地下再不斷郁動手腳就可以整到，Cute到呢。

輝人@MAMAMOO
唔知韓國係咪除咗堆雪人都流行堆雪鴨呢，無獨有偶MAMAMOO嘅輝人都整咗好多鴨仔，仲排滿一整條欄杆！鴨仔嘅Size十分迷你，只有手心咁大，成功將所有鴨仔放上欄杆之後，輝人同朋友開心到係咁歡呼，好搞笑。