搞動畫三十周年展覽 王友良讚謝嘉怡夠正面最似小丸子
2020-11-20 10:00 
最近王友良（Ivan）以櫻桃小丸子大中華區總代理身份，為小丸子動畫30周年，喺元朗大型商場內舉行展覽活動，將動畫中30個角色立體登場。小丸子對他有情意結：「因為小丸子係由細睇大嘅卡通人物，細個睇住佢嘅生活趣事，覺得佢係個好可愛嘅女仔，諗都諗唔到大個咗竟然認識到小丸子作者，仲同佢結成好朋友，一齊喺日本食飯、唱K，原來作者性格動態同小丸子完全一模一樣。喺佢穿針引線下，我成為咗小丸子大中華區總代理，小丸子唔單止陪我長大，都成為我商務上一個重大項目，我有爸爸心態，要保護住呢個『囡囡』，好擔心有不法商人做傷害佢嘅嘢。」
王友良覺得自己性格最似大野同學，同樣係正面、好動，好陽光嘅男仔：「所以之前拍過一個真人版電視劇，我都係演呢個角色，當然我冇佢咁靚仔，佢有好多Fans㗎！」至於他眼中最似小丸子嘅女藝人，應該係今年港姐冠軍謝嘉怡(Lisa)：「佢個人好正面、好開心、好真性情，當日選港姐時我經已有呢個感覺，而且佢以前做護士，一樣好有愛心，好彩佢冇小丸子啲古怪嘢。」
關鍵字
最新回應