BB百日宴爆喊得多過囡囡 雨僑當媽真偉大：自己湊係值得

雨僑於8月8日剖腹誕下女兒羅約彌（Harper），昨日她與老公羅力威為女兒在酒店舉辦小型百日宴，並在社交網分享相片，撰寫長文大談湊女辛酸史。她說：「呢一百日佢喊得多，我喊得仲多，由每分每秒都唔知佢喊乜？總之就日喊夜喊，一日嘔濕十幾套衫，鍾意就三日唔屙屎，到知道佢有肚風呀搓肚仔呀，人生目標短到淨係想你捱過一餐奶，唔好三個鐘頭全喊，見到你成條蟮（鱔）咁fing（揈）嚟fing（揈）去，個肚一定好痛真係好陰功。」
雨僑續謂：「到而家基本上係我幻想中嘅BB食玩瞓，真係萬水千山。為咗唔好嘈醒對方，總之諗得出嘅都試過晒，包括一個瞓一個匿喺㕑（廚）房抱住，因為㕑（廚）房最遠。最長試過十四五個鐘無離開過我心口，條頸同對手睇完醫師馬上又痛返，媽媽手已經唔理，係媽媽背媽媽膊媽媽全身，無數個夜晚抱住佢望住個天由黑變光，嗰種感覺真係難以形容，但係相信好多媽媽同我一樣，會覺得自己湊係值得，同埋就算有人幫嘅媽咪都唔會舒服太多，可以抱就抱因為佢大個就唔使你抱，望住佢初生細細粒到肥肥白白識笑，真係覺得好幸福。」