【獨家】父母以為騙案　Michael C 讀到書偏要做歌手

今年4月出道的新人Michael C，是Sony Music「平原習作」第三代成員。在港大讀書時，Michael C以原創歌曲參加校內歌唱比賽奪冠，賽後更被Sony揀中，點知父母以為個仔畀人呃，他只好將成件事全盤托出。出道短短半年，Michael C就在9月舉行了第一個個人線上音樂會，由Year 1遇上簽約機會，到畢業後才正式出道，這段時間當然磨拳擦掌有晒準備啦！撰文：何蔓琪 採訪：杜淑霞、何蔓琪　攝影：李維隆


「結」下不解緣

Michael C今年先後推出兩首自家創作歌曲《愚公》和《對頻之間》，「《愚公》貼近我一開頭寫歌嘅Style，比較正能量同青春，感覺陽光。《對頻之間》近而家寫歌嘅Style，結他（部分）多啲，Rhythmic得嚟又Chill。兩首歌都係呈現緊我最初嘅一面。」15歲時迷上方大同的音樂，Michael C尤其喜愛對方的專輯《15》，「方大同喺《15》入面成日彈電結他，我因為佢而練多咗，亦喺呢個時期開始接觸John Mayer、盧廣仲，好多不同嘅唱作人。」十分鐘意彈結他的Michael C自言結他仲係佢嘅靈感繆思，「我成日彈彈吓覺得幾好聽，就會想（將旋律）Extend落去，兩首新歌前奏都係咁嚟。」

感激命運巧合

畢業於港大的Michael C，其實早在Year 1已經畀Sony睇中，「當時我參加校內歌唱比賽，攞咗唱作組冠軍，完咗之後公司就有人遞卡片畀我啦。」雖然主修經濟及金融，但Michael C一直最想做音樂，「DSE考到30分左右，夠喺香港讀書，屋企人又比較傳統，覺得Kong U名氣大啲。我對呢科唔係太大興趣，所以唔算係好專注學業，放學後成日攞啲時間嚟寫歌。」Michael C更與公司交涉近半年才跟父母坦白，屋企人反應卻令他唔知嬲定笑好，「佢哋一開始以為係騙案，仲同我講『邊有人無啦啦簽你呀，仲要唱片公司！』。既然個仔對經濟金融真係冇興趣，又咁鐘意（音樂），不如畀佢做啦。而家佢哋好支持㗎啦，日日喺屋企播我首歌，播到我聽到自己把聲都覺得尷尬！」一切令Michael C覺得充滿巧合，如果沒有聽從屋企人建議入港大，就不會贏得校內Sing Con冠軍，成為歌手的路或者就會截然不同。

寫詞紀錄主題

既然年紀輕輕就簽約，點解今年先至出道？Michael C就解釋：「公司知道我其實好想快啲做呢行，但佢哋覺得應該要讀埋書先。我嗰科亦比較難同時兼顧，所以最後傾好咗，專心讀完畢業後先出道。」今年派台的兩首歌都是國語歌詞，令Michael C大爆自己其實有鋪填詞癮，「我唔鍾意錄Demo淨係哼歌，通常就會寫國語或英文詞落去，比較易寫之餘亦可以紀錄當刻嘅主題。下年就會出廣東歌㗎啦！」靈感經常湧現，Michael C不知不覺已儲下大批作品，「都作咗5、60首歌㗎！」眾多Demo之中又有冇一定要留俾自己唱的心頭好？大方的他表示沒有，「如果有前輩欣賞我作嘅曲，我都好歡迎對方拎走！」