【回春】IG晒性感黑絲美腿李司棋被讚人比花嬌唔似「登七」

2020-10-16 09:30

啱啱「登七」嘅李司棋對黑絲情有獨鍾，經常潮着黑網襪，試過分享疫情下生活日常，着住黑絲嘅司棋姐坐喺沙發上擺動雙腳兼扭動腳趾，好搞笑，相當有少女心。日前司棋姐上載一張同蘭花合照相，留言「朋友送的胡姬花，放了個多星期依然盛放，襟擺，襟睇！」相中托住香腮嘅司棋姐神采飛揚，加埋甜美笑容同埋白嫩皮膚，星味依舊，係保鮮完美示範。最搞鬼係，着住黑網絲襪嘅司棋姐唔經唔覺晒到滑腿，美腿比身後盤花具吸引力，好搶Fo。

網民亦錯焦點，唔再留意胡姬花，紛紛被司棋姐雙腳吸引住，留言「你對黑絲襪呢……！超吸睛呀！」、「表情好有少女feel！Oh！Sorry！胡姬花靚極都被比下！」、「太美！」、「看到你還是好像30-40歲年。」黃建東也讚「Wow性感黑絲美腿！」、陳婉婷話「人比花嬌！」對於被讚回春，司棋姐接受頭條訪問時笑說：「咪笑我，怎可能！」

另外，疫情下嘅司棋姐偷得浮生半日閒，昨日隨朋友遊艇去咗大澳一天遊，鬼咁開心周圍影相打卡，又買土產蝦醬：「不過天氣好熱，曬到不得了。」