【Headline Girls】「賈名媛」邱芷微真淑女

2020-10-12 17:30

處境劇《愛．回家之開心速遞》中，同「大小姐」林淑敏係死敵，又主動出擊勾引張景淳，挑戰呂慧儀同張景淳「龔水戀」嘅「賈名媛」邱芷微（Chelffy），角色雖然貪慕虛榮，唔多討好，但就成功入屋，都幾搶fo㗎。

畢業於英國布萊頓大學視覺藝術表演系嘅Chelffy，07年放假返港期間，因為参加由大名娛樂舉辦嘅《第一届大名星歌唱大賽》奪得季軍入行，約滿後輾轉入咗TVB拍劇，由特約演員做起：「因為唔係TVB合約藝員，拍到《愛．回家》真係講都冇人信，當日業餘形式做特約演員，劇組PA講得好隱晦，話有個角色想搵我做，係搵我影露肩、露腿道具相，但有得着祼色打底衫，而且有公仔喺前面遮住。當時心諗，電視尺度有限，最多咪出嗰兩秒…原來係演一個連戲角色，諗唔到冇刻意爭取，機會會送到埋身。」採訪：方騫平攝影：張詠森