【畀人鬧要員工執餐死】酒店房大執位 陸浩明床上望維港食早餐

因為疫情影響唔可以去旅行，近月好多酒店推出Staycation 優惠，食宿套票勁抵，五星級酒店包一晚住宿同雙人自助早餐都係2千蚊咁上下。以往一得閒就同女友陳詩欣(Ayan)去旅行嘅陸浩明(6號)都係咁Book酒店度假，上月尾喺港島區酒店住完慶祝拍拖周年紀念，呢幾日又再幫襯。

今日佢就大晒港女至愛打咭甫士，就係喺床上食早餐，仲留言，「Happy Friday 嘆個靚早餐」。見到6號將食物放滿張床，有夾餅，有生果又有麵包仲有香檳添，非常作狀，留意重點，張床完全貼近窗邊，可飽覽維港景色，乜而家啲酒店房嘅床咁近窗嘅咩?明顯間房經過大執位，所以有網友見到張相忍唔住問6號，「其實你影依張相之前有無諗過令酒店員工執餐死架？」6號秒回:「放心，當然要自己執返好啦。」而森美亦留言，「睇麻甩佬真係..... 😂」暗示睇麻甩佬咁作狀影相好難頂。