導演老友爆𤓓事 張孝全視像通話𠱁仔唔記得轉鏡頭

去年中，台灣國民老公張孝全被爆已於18年尾做咗爸爸兼結埋婚，張公子家陣應該未夠兩歲。男神老竇同《KANO》電影導演馬志翔好老友，後者亦剛做爸爸，兩位新手老竇之前趁父親節就約埋去Happy Hour，平時要湊仔同樣可以聯誼，就係玩視像通話，一個影住個B，另一個又影住個B，講吓BB話𠱁吓仔，老竇的浪漫算這種。

尋日，馬導演踢爆張孝全一件𤓓事，就係兩位老竇又玩視像通話𠱁仔，不過馬導演望極都只係望到張孝全個樣，個B呢?馬導演忍唔住影低再Post上ig，「學妹(孝全暱稱)很賣力的在逗孩子，很不忍心告訴他其實鏡頭是反的。」原來男神唔記得轉返個鏡頭，努力𠱁仔但人家只係見到佢個樣，好好笑。