【獨家】疫情下大覺悟忘記舊仇 洪永城唔開心事勿放喺心

由洪永城(Tony)主持及張志明監製的TVB節目《你還好嗎》，探討喺疫情下，東南亞及歐美等地人民嘅生活有乜變化。Tony坦言亦有所啟發，學會要「清空」自己：「呢個疫情，人與人之間好似多咗道門咁，社交係需要距離，但愛同關懷係唔需要距離嘅，發覺仇恨原來都係小事嚟，唔會再擺喺心！」採訪：方騫平

疫情下，洪永城坦言都有所啟發：「疫情前對朋友及家人忽略咗關懷，所以呢個時候，都有向世界各地朋友發出問候訊息，有啲成十年冇聯絡，之後遍佈世界各地嘅家庭群組嘅互動都會多少少。」問到跟親友疏離會否被誤會紅咗變冷漠？Tony即解畫：「佢哋明白我好忙，不過𠵱家開始諗，點解同親友嘅關係冇以前咁好呢？思考究竟發生過乜事？離唔開一個愛字，最後都係問一句『你還好嗎？』就可以解決到所有障礙。」

一切誤解都係小事
問到會否清除過往嘅誤解化敵為友？Tony坦言嗰啲都係小事：「𠵱家增長咗智慧，好多嘢都唔重要，有緣份就繼續，冇都冇辦法，唔會擺喺個心，原來擺咁多雜物喺個心入面都唔係咁好，要諗辦法去清空自己，令到自己個『背囊』再輕啲，目前無時無刻都接受新嘢，抱住一個正面嘅態度，打坐、冥想都足以清空心靈，除咗早睡早起，仲會參加網上課程進修，唔好畀自己停落嚟。」