轉行做街市監督 60歲車保羅爆當年扮「生疱疹」去秘撈摧毀星途

演過麗的電視《IQ成熟時》、《對對碰》等經典劇集，也曾幫TVB拍過劇嘅車保羅好耐冇喺幕前露面，車保羅日前亮相香港開電視節目「開工大吉77」接受苑瓊丹訪問，現年60歲的他現轉行做街市監督，因為正職好困身，亮相幕前要遷就時間：「𠵱家我返工要著制服、反光衣，唔可以亂咁請假，啲人約我拍嘢都要下午先得！轉行其實都冇咩尷尬，要做咪做囉，由細到大都做過好多行，當年周梁淑儀搵演員，佢地睇中搵我拍戲，拍咗三套之後，覺得好好玩所以入行。」

 

車保羅就話當年最風光時期，每日現身不同劇組，但因賭博而失去所有：「當年真係忙到組接組，我大概風光咗十年左右，真係忙到去銀行入錢都冇時間，每日一起身唔係問去邊度開工，而係問朋友收工去邊度玩！不過當年我賭錢，冇做咩投資最終咩都輸晒。」

 

隱暪公司「秘撈」拍電影，最終被揭發而令車保羅事業出現危機：「當年有人搵我拍戲，咁我就呃公司『生疱疹』，要去北京醫病，到我拍完返港，同片嘅葉蒨文喺機場東面出，我就行西面啦，點知佢見到記者要做訪問，就話剛剛同完亞視嘅車保羅拍戲，咁就成件事都穿晒。最終都要返公司認錯，被人扣一個月糧，同時又比稅局查封啲戶口，我當時心諗真係玩完喇。」因為「講大話」而離開電視圈，就算轉戰影壇，亦因為誠信而令事業跌入谷底：「當時因為冇錢請助手，自己又冇Mark清楚檔期，搞到失場，呢啲醜事傳千里，開始冇人搵我，靜咗足足六個月，我都開始諗吓係唔係要轉行先得。」

 

訪問期間車保羅多次提及菲籍妻子，二人生活相當甜蜜，亦掌管車保羅財政大權：「當年我搵佢做鐘點執屋，啲錢周圍擺，佢就提我收好啲錢，我覺得呢個女人唔簡單，開始試吓佢，發現啲錢冇少到，仲要好齊整咁擺好，對佢開始動心。後期我經濟唔好，周圍問人借錢，佢幫我記低借咗邊個錢，要還畀邊個咁，所以到今時今日，我都爭佢一個盛大婚禮。」