【維港會】網民分享「爆芽薯仔花」相 食安中心凌晨留言：嚇到個心離一離

若薯仔存放不當，則會變壞或發芽。近日有網民在網上分享圖片，並留言指「開得好燦爛嘅薯仔花」，又指該薯仔已放置了3個月。其後，食物安全中心「食安仔」亦在帖文下留言，呼籲市民勿進食發芽的薯仔，又直言「真係嚇到個心都離一離！」

Facebook專頁「Day Day Explode 日日爆」平日不時刊登網民的劣食經驗。在本周三（16日），專頁則刊載其中一名網民投稿。投稿網民指，「開得好燦爛嘅薯仔花，最後一次用呢批薯仔係7月頭，放咗3個月左右，我放布袋再放埋一角所以冇為意。薯仔發芽搣走啲芽就可以正常食架喇，但好似呢兩個咁真係放得太耐變軟晒就真係唔食得。」

相關照片亦引起食物安全中心的注意。食安中心Facebook專頁在當日凌晨以「食安仔」身份留言指，「要提提呢位朋友：馬鈴薯🥔一般含少量天然毒素苷生物鹼，但响發綠、發芽🌱或損壞後，苷生物鹼會大增。如馬鈴薯出現上述情形，應成個丟掉，因為好難判斷要把薯皮或發芽部分削幾深先算安全，而且烹煮過程係唔能夠破壞苷生物鹼！為免馬鈴薯變綠、發芽而產生苷生物鹼，馬鈴薯要貯存响陰涼乾爽嘅地方啊～」「食安仔」其後在回覆網民留言時亦直言，「呢幅圖真係嚇到個心都離一離！😰」

據食安中心網頁資料指，食用植物中的天然毒素常見例子有馬鈴薯中的甙生物鹼等。部分食用植物如馬鈴薯在發綠或發芽時，可能含有大量植物毒素。由於這些毒素非常耐熱，即使馬鈴薯已徹底煮熟，亦會引致食物中毒。中心亦呼籲，切勿進食已發芽、已發綠或已壞的馬鈴薯。