【維港會】外傭想分餸廚房獨享 港媽寧同枱食批「難服侍」

網上討論區「親子王國」有網民發文，指新聘請的菲傭暗示想分餸獨自在廚房食，港媽對此不解，批評「如果佢分開食，食幾多先自己夾起，我係無所謂，最麻煩係佢自己夾起，之後話我地唔夠餸畀佢，咁唔好煩啦，一齊食啦佢咁難服侍」，於是網上求教。

這位僱主發文指，她們一直都同外傭同枱食飯，去年換了一個有二十年經驗的新外傭，「佢琴日突然暗示佢以前啲僱主都係同佢分開食，因為佢食飯食得慢，意思係佢想分開食，我諗佢覺得自己食飯自由啲，又可以食飯時上下網。」

僱主經同家人商量，「家人都認為一齊食比較好」，僱主又透露，但每日4個人食的伙食費為100元一餐「佢（外傭）有兩日試過夾開食，係佢自已煮時先夾起的，唔係我地夾畀佢的，琴日話唔夠餸，所以我地話一齊食，唔洗夾來夾去，又話多又話少。」

僱主最後決定，「總之我比佢$6000一個月，食飯一齊食，大家都係食咁多，如果唔夠我真係養佢唔起，我之前有六個工人，無一個話唔夠食」。

不少網民認為應讓外傭自己食，「夾開食，你會唔會想me time 時同老闆餐餐一齊食。姐姐最開心一路食餐一路睇電話」、「我未請工時都以為一家人咁一齊食好，但用過咁多工人佢都話想自己分開食，然後我就明白，我食飯都唔想日日對住老細」、「一定要分開食，分下莊同閒。正如一碟雞佢次次夾走雞髀，魚佢次次夾走魚腩，第一二次唔出聲，之後就會妹仔變主人婆。佢唔食個啲你地食」。

不過也有家庭是與外傭同桌食飯，「我們與工人一直與他同枱吃飯（16年了），一齊閒話家常。她看到電視上新聞唔明白內容，我們會翻譯告訴她」、「我地冇所謂，多數一齊食。佢有時會自己行開食。up to her」。

也有人提議不如寧願折現給伙食費，讓菲傭自己更有彈性選擇吃甚麽、吃多少，不必與家人綁定。