做網上節目挑戰難度林珊珊頭炮向林德信請教拉筋

2020-09-14 20:50

寰亞經理人林珊珊 (Sandy)眼見兩位囡囡西瓜 (李澄) 及野人 (李怡) 活躍於社交平台，珊珊也嘗試跨界在網絡媒體YouTube平台建立新頻道《大家好All is well》，頭炮節目《Have a friend day》喺今晚上九時推出。首集便約好與西瓜、林德信 (Alex) 及西洋書法家Wendy 聚會：「我哋係好似朋友日常聚會咁，大家一齊唱吓歌，做吓運動，嘆杯咖啡，學吓寫書法，學呢樣整果樣，唔係背稿，中間又可以把歌談心，一起歡渡Have A Friend Day！你都想一齊共渡開心一日嘅，咪一齊加入囉。」

珊珊指出：「其中由 Alex 結他伴奏，我同西瓜合唱嘅《戀愛預告》，可能會帶畀大家驚喜，但對我嚟講最大嘅挑戰係Alex教我拉筋，雖然古語有云『根長一吋，延壽十年』，但我當時嘅感覺只係『死過翻生』，痛苦自己知，可能之後要經常保持練習，至會追得上佢設計嘅進度。」

珊珊最後還推介，大家一定要留意她跟西洋書法家老師 Wendy學書法一段，原因除了自己專注練習「手心冒汗」的神情確係真情流露之外，Wendy乃公司旗下五人樂隊 Nowhere Boys主音Van 的太座，各位 fans 要捧下場了。