拍片抄《破壞之王》 AK Lokman Alton@MIRROR向星爺致敬

2020-09-07 19:16

MIRROR的江𤒹生（Anson Kong）十分勤力更新YouTube Channel，幾乎每星期都有新片上架。之前邀請陳卓賢（Ian）測試大家默契，今次就搵埋隊友楊樂文（Lokman）同王智德（Alton），三個跳舞擔當將會一齊學跳新舞，挑戰不同舞種。全片8分鐘，當中最搞笑有Part抄足周星馳的《破壞之王》片段，星爺玩「抵抗失戀」，MIRROR三子就玩「抵抗甩Steps」，明顯向星爺致敬。

其實Lokman同Alton都對Locking比較了解，所以今次三位鏡仔率先挑戰。「LOCKING小教室」片段好有趣，首先以小劇場開始，Anson Kong向Lokman及Alton拜師但食檸檬，後來Anson Kong大哭，引來二人問他：「甩step呀？幾咁閒啫，係人都試過啦！第一次？咁係傷啲嘅，你而家唔適宜飲水㗎啦，我覺得你要換套老黎啲嘅衫沖喜下，聽首啱嘅音樂，食番個靚早餐，咁個人心情都會開朗好多㗎！」對白完全抄足周星馳94年的經典作《破壞之王》中星爺失戀，吳孟達𠱁佢嗰段對白，不過星爺嗰個就係「抵抗失戀套餐」，鏡仔就係「抵抗甩Steps沖喜套餐」，Lokman同Alton希望用呢個套餐幫Anson Kong學好跳舞。

之後三人換上Locking常見的colorful服飾表演，跳得好睇又搶眼，再坐定定向觀眾解說舞種的歷史和由來，如Locking是因為舞者Don Campbell的舞步特別，才吸引其他人學習模仿。一條片有齊搞笑及學習元素，相當有心。

Anson Kong表示三人會拍住上繼續拍片，之前為了做歌手而在歌藝下苦功，現在希望重拾擅長的跳舞，學習其他舞蹈，同時也希望與他們的跳舞老師聚舊。