【愛妻號】畫作獲餅店欣賞邀合作　黃智賢開心分享太太好成績

黃智賢（Ben）出名係愛妻號，雖然同太太Maggie結婚16年，但兩口子依然好鬼恩愛，年前太太想辭掉文職工作去追尋畫家夢，Ben當然全力支持。於是Maggie以「Macaron」之名開始當全職畫家，並開設自家網頁「Macaron Love Painting」出售畫作，亦有將作品於西貢一間咖啡店、ICC天際100紀念品店寄賣，售價由一千至萬多元不等。除此之外，她最近仲將屋企變做畫室，開班教授畫畫。Ben 亦不時喺社交平台，分享太太靚靚畫作打氣。最近Ben再有好消息同《頭條》講，原來太太作品得到餅店欣賞，獲邀跟「Little Miss Macarons」合作，設計中秋節包裝，太太有此好成績，廿四孝老公Ben當然同大家分享呢件開心事啦！