【獨家】疫情下街頭拍打戲碌落地 陳展鵬拍到虛脫要飲酒放鬆

之前陳展鵬為拍TVB新劇《超能使者》一場衝突戲，喺西貢街頭同郭子豪大打出手，展鵬更被郭子豪推埋牆邊，仲打到碌晒落地。為咗頭家，展鵬自言會撐到底，最多返到屋企大清洗先抱個女小豬比。就算早前爆發娛樂圈感染群組，展鵬都只係帶齊消毒用品返工，如常開廠，冇有怕！採訪：方騫平 李維隆

在新劇中陳展鵬演小人物角色，因為一事無成，好驚「女神老婆」劉佩玥會紅杏出牆而變得好自卑，所以就去質問郭子豪，兩人先口角繼而動粗，展鵬被郭子豪推埋牆仲踢多腳，兩人打到落地扭作一團，打完交後，展鵬拔足狂跑逃離現場：「為咗動作流暢，我冇加墊，有時大家講信任，又唔係危險動作，因為要出7成力，少少真打先真實，所以我隻耳仔擦損咗少少，重要部位都俾對方隻腳趾『啄』到，冇事嘅，最多咪瘀咗，又唔係斷咗。」

精神好攰要出廠唞氣
拍外景當日又曬又焗，展鵬着長袖衫拍打交戲都幾辛苦，而為咗展現頽廢樣，展鵬冇化妝，只有少少遮瑕。展鵬透露拍新劇最辛苦反而係精神上：「拍呢啲角色真係好攰，因為太入戲，有場戲要出廠透氣，好想『逃學』唔拍，但咁大個人唔可能咁做，連老婆睇完劇本都讚我勁，因為個角色真係好難走得返出嚟，所以嗰日我同子豪打完交，面青口唇白，有虛脫感覺，返到屋企仲感覺有嘢，就算凌晨4點都要飲啲酒嚟放鬆。」展鵬有感而發，「年輕時演戲未必咁到肉，家陣明白李司棋所講，拍喊戲只可以一take過，因為係用真感情去拍，唔係小朋友扭計喊，拍完會好攰。」