【独家】疫情下街头拍打戏碌落地 陈展鹏拍到虚脱要饮酒放松

之前陈展鹏为拍TVB新剧《超能使者》一场冲突戏，喺西贡街头同郭子豪大打出手，展鹏更被郭子豪推埋墙边，仲打到碌晒落地。为咗头家，展鹏自言会撑到底，最多返到屋企大清洗先抱个女小猪比。就算早前爆发娱乐圈感染群组，展鹏都只系带齐消毒用品返工，如常开厂，冇有怕！采访：方骞平 李维隆

在新剧中陈展鹏演小人物角色，因为一事无成，好惊「女神老婆」刘佩玥会红杏出墙而变得好自卑，所以就去质问郭子豪，两人先口角继而动粗，展鹏被郭子豪推埋墙仲踢多脚，两人打到落地扭作一团，打完交后，展鹏拔足狂跑逃离现场：「为咗动作流畅，我冇加垫，有时大家讲信任，又唔系危险动作，因为要出7成力，少少真打先真实，所以我只耳仔擦损咗少少，重要部位都俾对方只脚趾『啄』到，冇事嘅，最多咪瘀咗，又唔系断咗。」

精神好攰要出厂唞气
拍外景当日又晒又焗，展鹏着长袖衫拍打交戏都几辛苦，而为咗展现頽废样，展鹏冇化妆，只有少少遮瑕。展鹏透露拍新剧最辛苦反而系精神上：「拍呢啲角色真系好攰，因为太入戏，有场戏要出厂透气，好想『逃学』唔拍，但咁大个人唔可能咁做，连老婆睇完剧本都赞我劲，因为个角色真系好难走得返出嚟，所以嗰日我同子豪打完交，面青口唇白，有虚脱感觉，返到屋企仲感觉有嘢，就算凌晨4点都要饮啲酒嚟放松。」展鹏有感而发，「年轻时演戏未必咁到肉，家阵明白李司棋所讲，拍喊戏只可以一take过，因为系用真感情去拍，唔系小朋友扭计喊，拍完会好攰。」