【獨家】舊愛林作瘋狂得罪人 麥明詩行完山公園吹水

十優港姐麥明詩舊年淡出娛樂圈轉職管理諮詢公司做商業顧問，同TVB改簽「綠葉約」一年一騷，剛播畢的《殺手》是其告別作。搭上失婚婦裕美嘅舊愛林作最近轉行做保險，由於言行出位經常周圍惹「火頭」得罪人，麥明詩當年好彩甩得快。日前下午見到麥明詩同一班朋友行完山再坐喺淺水灣海邊公園除口罩吹水，當時未有「室外戴罩令」及「二人限聚令」，吹完水搭車返歸，生活好健康。採訪:張詠森

麥明詩喺《殺手》中飾演失明人士，獲網民讚演技有進步，伍詠薇也發文鼓勵，「麥明詩，意外驚喜，做得好好！成套劇，本宮最留意同幾期待此女人出場，加油！」但好可惜，十優港姐冇興趣賣樣同賣藝，佢話要挑戰自己轉行賣腦，加入國際知名管理諮詢公司麥肯錫（McKinsey）工作，為各大企業制定策略和管理計劃，辛苦但更有滿足感！

冇人認得麥明詩
日前下午，見到戴咗口罩，好瘦嘅麥明詩約咗一班朋友去港島區行山吸收新鮮空氣，到達目的地淺水灣後，眾人入咗超市買水飲，拎住火腿同水嘅麥明詩同男友人好好傾，由於戴晒口罩又冇化妝，所以冇人認得麥明詩，買完再去附近公園坐吓吹吓水回吓氣，幾位朋友都好遵從社交距離隔住坐，其間麥明詩及好傾男友人都除低口罩唞吓，Hea坐半個鐘就各自截的士返歸。