演技獲伍詠薇麥媽媽讚賞 麥明詩被網民鬧爆累死李佳芯
2020-08-07 11:30 
由陳維冠監製，無綫熱播劇《殺手》今晚大結局，噚晚一集劇情相當緊湊，「殺手獵人」Parker（謝東閔飾）除咗殺埋Bill（戴耀明飾）外，仲捉走Cash（李佳芯飾），Cash先被Parker敲斷腳，再被撞爆頭，最後被綁喺海入面慘死， 而Parker挾持閰武（黎耀烊飾）女兒Megan(阿之)（麥明詩飾）逃亡時遇上為Cash報仇嘅Zero（陳豪飾），閰武趕到為咗個女安危而極力阻止Zero出手，而另方面Megan仍想保護Parker，結果Zero再次用一粒子彈，射殺Megan與Parker，真係死得人多。
網民叫離開變態佬
噚晚麥明詩(Louisa)喺FB發文兩段，除咗上載眼定定，但笑晒口同謝東閔合照，留言「他是愛我的，是嗎？」外，還轉載返上月中伍姑娘(伍詠薇)對她演技的讚賞評論，文中伍姑娘話「麥明詩…意外驚喜…做得好好…成套劇…本宮最留意同幾期待此女人出場…加油#我都係一個觀眾亦係演員非常欣賞呢位新人演出#其實我唔識佢㗎」Louisa好感謝伍姑娘嘅鼓勵，再次多謝當時各位前輩嘅指導。伍姑娘就回應「睇好你…非池中物…有機會合作…」
唔打算返食回頭草
唔少網民大讚麥明詩演技進步咗好多，連麥媽媽何小娟都留言話：「Louisa，你的演技真的進步了很多，我看到你之前下了這麼多功夫和努力，這些並沒有白費，為你鼓掌！」不過，有網民批評她行動太快，舉動唔似失明人士，麥明詩都有謝謝意見。網民乘機叫她回巢，勸她唔好嘥咗好機會。仲有人求證：「唔係江美儀話你重回娘家咩？」Louisa卻否認有食回頭草呢個打算，留言係誤會。
愛情讓人變得白癡
另外，因為噚晚嗰集Megan同Cash本身已逃離現場匿藏起來，但Megan因太愛Parker，挺身回應呼喚而累死咗Cash，被唔少網民留言鬧爆「今晚殺咗你」、「你害埋自己啦，好嬲呀！」、「你累死咗Cash，點解要害佢？」、「佢好恐怖！」、「是非分明勇往直前嘅阿之，今集變咗低能！」Louisa就喺留言度解構讓大家消吓氣：「愛情讓人變得白癡！」
最新回應