【有錢真好】老公有遊艇得閒又出海 方媛完全冇抗疫疲勞

雖然早前郭富城老婆方媛(Moka)捲入「天王嫂訓練營」風波，但完全冇影響城嫂嘅心情，更高調在社交網貼出全家賀佢33歲牛一嘅溫馨照，城城更攬住老婆一齊做心心手勢，以行動話畀大家知完全無視傳聞。

有老公錫嘅城嫂好開心，所以又坐住老公嘅遊艇出海，仲做埋直播分享快樂，着住白色吊帶裙及紥住馬尾嘅城嫂好白，白到反晒光，從手機角度睇，揸機嘅應該係城城，所以城嫂係咁擺甫士，做過內地𡃁模真係唔同啲，擺極都有。不過開得直播自然吸引好多口痕網友留言，有人話想做「古天樂老婆」同「彭于晏老婆」仲希望佢介紹。

其實城嫂好鍾意海，唔係同老公出海就係出海同老友慶祝生日，就算香港疫情幾嚴峻對佢都毫無影響，專家叫香港人盡量Stay Home，但城城有錢又有遊艇，兩公婆出海吹海風，抗疫疲勞?咩嚟㗎?