【新冠肺炎】唔希望喺呢個時候冒險馬浚偉宣佈舞台劇延期

2020-08-17 09:45

由馬浚偉(馬仔)監製、編劇、導演、演出兼出品、黎瑞恩主演的舞台劇《男人40 CEO》，原定9月11日至9月26日喺藝術中心公演10場，惟第三波新冠肺炎疫情反覆，亦受限聚令影響入場人數，昨晚馬浚偉宣布《男》劇將延至明年6月11日至6月26日演出，以確保觀眾、表演團隊與工作人員安全及健康，門票退款的安排將於8月25日公佈。

馬浚偉拍下片段交代延期一事：「由於近日香港嘅疫情依然非常嚴峻，而每日嘅感染個案依然有雙位數字，雖然偶有回落，仍然係非常唔穩定。我經過連月來一直有考慮，我覺得，關顧到所有人嘅健康，包括觀眾、台前幕後嘅工作人員、演員，我都唔希望佢哋喺呢個時候有一個冒險，聚集咗好多嘅朋友一齊去睇呢個舞台劇，所以最後決定延期。」

「我好感謝每位買飛嘅朋友，特別係6月嘅時候開始預售，到7月公開發售時，我哋嘅飛賣得非常之好。雖然喺限聚令下，我哋只能賣一半門票。其實我之前曾經講過，如去到8月中、下旬只能賣一半，再加上疫情係嚴峻，我哋係冇辦法做落去嘅，所以各方面考慮，當然最重要係觀眾、演員、工作人員，所有人安全，大家嘅健康係我最首要考慮，場地同我哋成個團隊成員溝通過後，感恩大家非常支持我哋呢個決定，大家達成好協議，決定將《男人40 CEO》延期至明年6月11日到6月26日。」

「當然係原班人馬，大家唔使擔心，所有都一樣。始終唔能夠冒呢個險，不能因為我哋嘅演出，而增加感染或被感染嘅風險，亦唔可以增加醫護界嘅負擔同壓力，呢個係我哋嘅責任，作為一個劇團及公司負責人，我哋係有呢個責任唔可以畀呢件事發生。我知道好多朋友想睇我哋嘅演出，因為套戲真係好好笑！」

馬浚偉還表示，會先將款項全數退回畀已購票嘅朋友，預計明年3月中、3月尾開始賣飛，大家到時再去買過。