眉心「生蛇」纏擾一個月   黎瑞恩病情反覆最驚毀容

正當大家以為月前黎瑞恩閉門，專心喺屋企網上綵排馬浚偉出品嘅舞台劇《男人40 CEO》之際，昨晚她喺社交平台上載照片，相中的她眼睛及眉心位置又紅又腫，生晒水泡，相當嚇人！原來小恩子喺疫情下「生蛇」生到上眼，「蛇仔」又癢又痛，最後都要向劇團告假好好休息，幸而目前已漸漸康復，曾擔心會留疤毀容嘅小恩子放下心頭大石！

 

她發文說︰「我係想同大家講，我病咗呀！上次同大家開完Live之後，隔咗兩日，發現隻眼好唔舒服腫咗，初時以為自己生眼瘡，點知睇完醫生話我隻眼生蛇，唉！我成個人最靚就係對眼，點知...上次Live已經係7月23日，條蛇搞咗我差唔多已經一個月喇，因為疫情，舞台劇改咗在家ZOOM排練，初時都有頂硬上，但愈來愈辛苦，最後都要向劇團告假，喺屋企大概休息咗3個禮拜，病情反反覆覆，𠵱家好似已漸入佳境，但係就非常痕癢，希望盡快好番，等到差唔多好番(返)曬（晒），就可以同大家見面，暫時仲要繼續忍一忍。尋（噚）日收到舞台劇通知，因為疫情要延期，非常可惜，不過希望大家體諒，6月見大家喇，好掛住大家呀！更要多謝《男人40 CEO》劇團各位隊友，呢段時間辛苦大家啦！」

 

唔少網民及圈中友好祝她早日康復，提醒她要多休息提高免疫力，叮囑她養好身子，等她康復後再開Live，小恩子就回覆話：「睇到哂喇！感謝大家俾(畀)我嘅各種治療方法同祝福，放心！我會好快好返嘅！我見到大家開live開得咁開心，我都好想唱㗎！希望下個禮拜尾可以唱歌俾(畀)大家聽啦！」