【幸福一家】郭可頌生日熊黛林派孖女獻吻冧爆壽星爸

2020-08-12 11:30

有時幸福唔止係自己感受，仲要晒吓嘅！呢方面喺天王郭富城同方媛係最佳演繹，好似日前城嫂33歲生日，除咗唔少得晒一家四口溫馨合照外，兩公婆仲合體，用身體語言砌個心形，晒命式要公告畀全世界人知道「百毒不侵」，不管方媛有冇靠「天王嫂訓練營」嚟打造高質美女，兩公婆依然咁恩愛，係Sweet呀！

講到呢度，好喇！到城城舊愛熊黛林（Lynn）出場，噚日係佢擁有百億資產老公郭可頌嘅生日，喺疫情下，一家人只能喺屋企切吓蛋糕、食個住家飯簡單慶生。少奶奶Lynn亦晒出一家四口嘅溫馨相，另外，兩個寶貝女Kaylor和Lyvia仲吻賀爸爸，郭可頌左擁右抱孖女，慈父樣出晒嚟，至於兩公婆嘅甜蜜合照就欠奉，但大家都收到佢哋嘅喜悅，紛紛留言係幸福一家、羨慕的一家、永遠幸福快樂。相中素顏郭師奶仍然清秀，被讚係女神。