【仲喺醫院】留院一周今晨開心宣佈出院　鄧達智等足7個鐘未獲發解除令

著名時裝設計師鄧達智早前確診新冠肺炎，上月28日獲送入聯合醫院治療，留院一個星期後，今晨鄧達智終於宣佈好消息，表示準備出院回家！心情大好的他除下口罩拍片，並滿面笑容地說：「今早醫生通知我驗血報告出現抗體，表示身體沒有病毒，做好準備後可讓我返屋企。目前情況好開心，確診4日後才入醫院，因為入院已一個星期，同身邊人、工作cut off超過10日，好想好想返屋企。這段時間好多謝老朋友、家人、親戚，有些平時少交往、比較隱居的朋友都出現send message給我鼓勵和打氣，所以好多謝他們。在醫院一個星期又不算是好辛苦，除了打針和食藥那段時間比較辛苦……發冷發熱發燒，其他時間醫生護士照顧得好周到，是一個好難得的經驗。」

未料到傍晚4時許，仍在醫院的鄧達智嬲爆向傳媒表示：「因為確診者唔可以周圍走，要等衞生防護中心發解除令，咁醫生今朝10點簽紙Fax俾佢哋，佢哋就會通知番醫院我走得，但由朝早10點到而家5點，7個鐘係咁喺度等係咁喺度等，解除令都仲未落嚟囉！雖然我知道佢哋好忙，但無理由咁樣浪費時間，同埋個牀位要等住用。」