傳同門JW離巢準備嫁人　吳業坤：希望佢會派帖俾我

吳業坤（坤哥）今日現身將軍澳電視城為劇集《殺手》宣傳，操弗不少的坤哥在台上做深蹲，又與高海寧齊齊投訴劇中冇牀戲。問到是否好恨拍牀戲？坤哥笑言：「始終甚麼類型的戲都想挑戰吓。（未試過拍牀戲？）未試過好傳統的牀上戲，即是兩個人一張被，在被裏面做運動嗰啲，以前睇《K-100》係咁講㗎！（現場揀同邊個拍牀戲？）揀唔落手喎，俾龔嘉欣聽到會踢死我！」提到大家都想開續集，坤哥透露大結局亦留下好多迷底，自己的角色亦可以開外傳。

提到好友JW（王灝兒）宣佈將離開唱片公司，而坤哥於今年加盟做「同門」不久，問是否出招趕對方走？他笑道：「我都覺得好突然，她在的話會開心、有火花些，大家是好難得的歌手朋友，即使將來不同公司都可以有更多合作，祝她前程錦繡。（加入時有問JW意見？）有呀，她說好開心，但又沒講她要走！（JW有講去邊間公司？）冇講呀。（又話係好朋友？）好朋友都有底線。」有傳JW是準備嫁人而離開，坤哥表示不知情：「希望佢結婚會派帖俾我啦！」至於前緋聞女友趙慧珊（Aka）被狗咬破相，坤哥表示有問候對方並祝她早日康復。