【耍花槍】疫情下玩煮飯仔晒廚藝 JW被男友潑冷水發爛渣：以後唔煮畀你食

2020-07-23 12:30

新冠肺炎繼續肆虐本港，第3波疫情大爆發，本地確診數字錄得逾百宗，政府呼籲市民盡量留喺屋企減少出外傳播風險。王灝兒 (JW)都算聽話，疫情下冇周圍去，盡量留喺屋企同12億化妝店太子爺男友葉韋彤（Tarzan）煮吓飯仔，都別有一番情趣嘅。昨晚JW喺IG出Post，好滿足感show自家炮製嘅粉絲蒸蟶子，寫道：「留在家中，又係時候train我嘅cooking skills!!! Hahaha我整嘅粉絲蒸蟶子，成功！」

其實呢味餸冇乜難度，所以睇落都算見得吓人，惟一係冇汁鋪面，睇落乾身咗啲囉。正當JW興致勃勃Show廚藝，唔少朋友及網民都讚好時，男友Tarzan竟然留言潑冷水說：「火你都未識開！」被「辣㷫」JW馬上開火說：「以後唔煮畀你食！」Tarzan即被打沉，唔敢再駁嘴，兩人公開耍花槍，十分搞笑。