【眾籌得2萬】唔夠錢拍真MV焗低成本製作　肥仔＠ERROR犧牲色相激凸上陣

男子組合MIRROR近日推出新歌《IGNITED》，發佈「Too Hot To Handle Version」MV後，不少粉絲不滿經理人兼MV導演花姐偏心，無論成員的鏡頭及歌詞份量都分配不均。然而，同樣出身自ViuTV選秀節目《全民造星》的另一組合ERROR似乎亦遭公司大細超，成員193（郭嘉駿）前日於社交網撰長文，直言因ERROR給予人「騎呢、岩巉、樣衰、搞笑、無腦」的形象，導致工作受侷限，希望成為Fashion Model/Icon的他苦呻：「我亦都好羨慕Mirror會有唔同嘅時裝品牌搵佢哋好型好chok咁拍廣告，收錢着住時裝品牌嘅衫出event……」

其實4月初ERROR都出了一首歌《我們很帥》，當時於YouTube發佈了「官方正式假MV/歌詞版」MV，影片中四子惡搞扮成經典台劇《流星花園》中的F4，而整個MV均以照片Slideshow形式，再穿插部分影樓Behind the scene的短片製作而成，極之粗糙。該MV推出後，ERROR都在社交網呼籲粉絲買Tee眾籌，讓他們有機會拍個「真MV」，結果事隔兩個多月，日前《我們很帥》真MV終於曝光，喺短短兩日累積近4.7萬Views之餘，仲成功登上YouTube熱門！

在「真MV」一開頭，成員保錡（吳保錡）宣佈合共賣出的404蚊一件Tee，最終扣除成本共籌得2萬多元，再減去租場及置景兩項費用，已超支3,500蚊Budget，成員們不單止要「倒貼」，仲要請大班幕後做「義工」幫手拍攝，193說：「所以今日拍MV嘅形式，將會喺工作人員冇糧出嘅怒氣同美感之間拎番個平衡，希望大家細心欣賞。」故以「All white look」示人的四子就在簡陋的白色布景前下跪，任由工作人員用裝滿顏料的水槍、氣球水彈等狂砸，搞到他們由頭到腳全身五顏六色，當中最大犧牲的莫過於肥仔（梁業），事關笠上「冬菇頭」假髮勁Cute的他，僅穿Tube Top加白色三角底褲，媲美電影《西遊記第壹佰零壹回之月光寶盒》中吳孟達的「性感夏威夷女郎」造型；片中，其下體仲被Close up（特寫）影住俾氣球水彈重擊，真係隔住個Mon都覺得又痛又尷尬，其後還被花盆高空擲落頭，當場翻白眼「暈倒」，非常爆笑！

如此用（苦）心製作，自然獲得大批網民讚好！對於該MV衝上YouTube 熱門，阿Dee（何啟華）昨晚於IG留言：「我其實好開心，大家為我哋心痛。咁證明咗《#Error自救TV》嘅成功，令大家睇到另一面嘅我地，亦證明咗我哋唔需要單一地只做嘩眾取寵嘅事而獲得大家嘅認同，因為Error正在銳（蛻）變；你哋點睇個MV亦都反映咗，你哋自身對我哋嘅投射同認知。今次Mike導x《#花姐Error遊》班底，用咗一個好聰明嘅手法，低成本去拍咗個不乏深度嘅MV，行刑、水彈、顏料、大染缸⋯殘酷嗎？其實並不殘酷，現實Error就係咁樣殺出一條血路。我很喜歡這個MV，唯一遺憾係唔夠budget請班比堅尼女郎同我哋拍，配合返《我們很帥》呢個主題。但我相信，苦盡必定甘來，這個時代就是一個，要一起咬緊牙關地過的時代『有你有我』，唔係一個口號，係一個事實，因為有你哋，我哋會繼續掙扎，直到看見那一條雨後的彩虹。」