【ERROR自救TV】送新著作被拒收 曾俊華反串保錡：你未必睇得明啵！

由ERROR四子梁業（肥仔）、何啟華（阿Dee）、吳保錡（保錡）、郭嘉駿（193）主持的ViuTV節目《ERROR自救TV》，下周一（15日）一集，請來社會名人曾俊華做嘉賓幫他們特訓，增加個人修養改進自己。

保錡一直被認為沒有內涵及MK，這集攝製隊安排他訪問社會名人曾俊華，以增加個人修養。平日嘻嘻哈哈的保錡亦嚴陣以待，但在正式拍攝前不斷唉聲嘆氣，腳不停發抖，更表示驚到想嘔。保錡與曾俊華碰面後，保錡竟以「一世人兩兄弟，有你有我！有今生冇來世！」作開場白。曾俊華先大讚保錡靚仔，隨即揶揄他一句：「好少見你着得咁靚仔」。訪問中，保錡問熱愛劍擊的曾俊華，「你玩嘅劍叫咩名？」曾俊華秒速回應：「劍咪劍囉！」令保錡非常尷尬！一同接受訪問的顏耀輝先生幫手解圍指，曾俊華有出書可以送贈一本給保錡，抵死的保錡先答：「唔使！」旋即又改口話：「好啊！」令曾俊華以「你未必睇得明啵！」串爆他！

保錡指自己曾於演出時跳笨豬跳及食昆蟲，曾俊華大感驚訝問：「你哋受過特別訓練？」保錡如開籠雀般大談食水曱甴經歷，聽得對方目瞪口呆！及後，肥仔、阿Dee及193出場問曾俊華有冇聽過他們的新歌《我們很帥》，並即場向他搲撈指可以邀請他們到周年晚會表演！四子亦相當識做，自彈自唱曾俊華愛聽的《浪子心聲》，更與他一同Jam歌，𠱁得對方非常高興！