【又會咁嘅】火速刪去童年靚相城城大女八成似兒時方媛

2020-06-02 11:30

趁住「六一兒童節」，「城嫂」方媛（Moka）昨晚喺微博上載咗兩張小童及中童照，並留言：「猜猜大寶和小寶誰和我小時候比較像？六一兒童節」，不過，出PO一陣，Moka竟然火速刪相，童年相好快就冇得留低。

不過，本報記者眼明手快，有幸睇到「城嫂」兒時可愛靚相，相嘅Moka束住孖辮仔，相當可愛，從前Baby fat有包子臉，如今臉型的確更顯瘦，而且眼、鼻、口輪廓較深，大大吓仲有埋雙眼皮，兼冇咗個眼袋，真係女大十八變，愈嚟愈高質同靚，連天王城城都勁Like，錫到老婆燶。

由於二寶從未曝光，反而喺《郭富城鼓舞‧動起來網上慈善演唱會》中方媛帶過大女Chantelle到場支持，仲罕有咁喺海旁一家三口合照留影。Chantelle雖然戴住口罩，不過紮住兩個小髻仔嘅大寶眼仔碌碌，驟眼睇都有啲媽咪影子，雙眼及前額相似度有八成。