【咩係不妙？】父子被蟾蜍嚇到彈起　杜德偉夜晚拖囝囝去「探險」

杜德偉（Alex）近日帶太太李曉冰（Ice）和3歲兒子Alex Junior（AJ）入長洲露營，此趟一家三口仲選擇住蒙古包，AJ甫見到張牀已經興奮到紮紮跳！Ice昨晚再於囝囝的Instagram分享營中點滴，原來一班小朋友夜晚拎住盞燈仔去「探險」，其中一段片中，看到Alex拖住囝囝與其他小朋友一齊踎地研究蟾蜍，他耐心向大家講解：「佢同地下啲色係一樣，佢而家玩迷彩呀，佢當你哋唔知佢係青蛙（蟾蜍），以為佢係石頭，佢心諗呢次不妙喇。」語畢其中一位妹豬問：「咩叫不妙呀？」Alex就回答：「即係大件事喇，畀人捉咗！」對話爆笑，結果講完冇耐隻蟾蜍忽然跳走，嚇到眾人彈起身！

雖然玩咗成晚AJ都嗌晒攰，但第二朝瞓醒又精力充沛再玩過，他們除了在野外用餐外，更有機會體驗「遊牧民族」生活，杜氏一家朝早便被好多羊咩咩包圍，不過AJ似乎有啲驚，相中的他一直匿喺一個哥哥身後偷望，唔少網民睇見都大讚好得意！