【單身狗入嚟】不斷失戀唔使驚《嚇鬼女朋友》嚇到你識諗

近年嘅泰國電影相當出色，乜題材都有，愛情片夠甜，笑片真係好爆笑。最新有集愛情、搞笑及驚慄於一身的《嚇鬼女朋友》，由泰國男神Mario同泰國國民初戀Ploy主演，男嘅曾演在港票房唔錯的《嚇鬼阿嫂》，之後亦曾拍港產片《感動她77次》，跟周柏豪、蔡卓妍有對手戲。

而女主角Ploy同韓團Blackpink的Lisa如孖妹，因為生得甜而被泰國人公認為「國民初戀」，ig有成34萬Follower。主角有樣都要有好劇本Back Up，《嚇鬼女朋友》講啲乜?講年青人想拍拖但遇唔到啱嘅人，拍吓又散無限Loop。電影就同大家對症下藥，分析你單身的原因，新聞稿咁寫：「『做人太方丈』、『太與別不同』、『太煩』、甚至是『見到鬼』都可以是單身原因。電影就教大家如何治療破碎的心，重拾對愛情的信心之餘亦教你如何『看到』愛情。」

戲中女主角林從小有陰陽眼，但怕鍾意嘅人以為自己黐線而一直冇向佢哋坦白。長大後林再遇到白馬王子，但經常見到鬼的她令男朋友覺得她太神經質，最後分手。一次又一次的心碎經歷令林決定出走郊外靜一靜，再入住「失戀隔離營」，與世隔絕，重整旗鼓。入營後她遇上同樣都是單身的營友普，普一向都不信世上有鬼，但因為要為鬼片找寫作靈感，特意走到深山，就遇上有陰陽眼的林，二人相處由打打鬧鬧到互生情愫，臨門一腳前男友再次出現，好曲折呀。