【依然好瘦】520 晒全家福宣佈再陀B　陳凱琳：Rafa好快就做哥哥

恭喜鄭太再做媽咪喇！

現年28歲的陳凱琳（Grace）與鄭嘉穎於2018年結婚，並於去年情人節誕下兒子鄭承悅（Rafael），前日就有消息傳出Grace兩年抱兩，再度懷孕！事後，鄭氏夫婦都一直沒有蒲頭否認，一班「鐡馬家族」兄弟姊妹則齊齊封口，好友唐詩詠日前仲好驚訝稱：「有冇咁快？沒可能！」殊不知趁住「520（我愛你）」這個甜蜜日子，兩公婆今日就分別於社交網正式宣佈喜訊，並貼出多張夫妻及「一家四口」的幸福合照，Grace寫道：「Rafa好快就要做哥哥啦~ 好開心可以喺『520』宣佈我哋家庭將會多添一個新成員！喺呢段日子好感激我老公嘅細心照顧，亦都要多謝屋企人同朋友幫我保守呢個秘密同時送上充滿愛嘅祝福畀我哋！感恩收到 @k11artus 呢份baby-staycation 嘅禮物～ 每朝起身可以行出露台，望住美麗嘅海景，真係好享受！希望BB出世之後同哥哥一樣咁健康，咁有活力！God Bless！（P.s. I really think Rafa is going to be an amazing big brother! Don’t you agree?）」

相中，身穿泰山膊連身裙的Grace雖然懷孕，但面部與手臂依然纖幼，腹部則已微微隆起，她更與老公甜蜜相擁、鼻掂鼻，認真閃爆！隨後嘉穎也出Po：「Rafa is going to be a big brother soon!」一眾圈中好友龔嘉欣、譚開琪、張繼聰、李亞男、蔡思貝等紛紛送上祝賀，龔嘉欣更留言：「我們都很開心，又多一位成員來到你們這個充滿着超級多愛和溫暖的家庭，感動。」咁感動不如自己快啲結婚生番個啦！