【頭條獨家】老婆助演超級賤男 譚俊彥唔會抽離唔到角色

譚俊彥(Shaun)喺TVB新劇《十八年後的終極告白》中好有發揮，由正直變成陰森，經常講大話、呃女人感情，仲會出賣朋友。Shaun強調作為一個專業演員，唔會抽離唔到角色變賤男：「去一次旅行，連同負面情緒乜都唔記得晒啦，離開香港係放電嘅最好方法。」採訪：方騫平

《十八年後》係兩年前存貨，對譚俊彥來說，播出時間啱啱好：「因為有《法證先鋒IV》對比，喺TVB終於覺得自己真係似返個演員，每套劇都有啲唔同嘢畀觀眾睇。『林朗生』同我本身性格好唔同，所以好難演，好彩有太太同我搵出陰險一面，佢陪我拍劇，坐喺鏡頭前畀中肯意見我，有場監獄戲，我要同年輕版自己做戲，笑到喊，喊到笑，感覺好恐怖。」

餐廳蝕百萬
譚俊彥慶幸一年前同TVB簽咗新約，收入算穩定少少，喺疫情下仲頂得住：「我絕對唔係為興趣拍劇，我係要養小朋友，好多人誤會星二代唔使做，但爸爸狄龍冇做生意，要使錢，佢啲積蓄只夠佢過下半生，我40歲喇，應該我搵錢畀屋企人，唔會問家人拎錢。不過，𠵱家飲食生意難做。」Shaun又提到在土瓜灣經營的西餐廳試過一周有兩、三日冇客人，「餐應主打出售西班牙火腿，之前西班牙受疫情影響，乜貨都攞唔到，運費又倍增，所以呢幾個月，我同股東每人至少蝕100萬，月尾結數時真係心都滴血，大家都驚，但又唔敢話畀老婆聽，始終仲有兩個小朋友讀書。有個拍檔冇出糧兩個月，每個月大廚要分段出糧，攞到20萬抗疫基金只係幫到少少。」