【食得夠占系列】抗疫期瘋狂地煮 少爺占玩到自製叉燒飯

2月初，輸入本港的新冠肺炎確診個案不斷增加，當時內地確診宗數已逾3000宗，康文署更宣布所有文康設施暫停開放，直至另行通告，學校停課延長，香港人如臨大敵。

由當時開始少爺占開始重拾鑊鏟煮嘢食，佢乜都煮，有洋葱湯有炒飯有湯圓有古早味蛋糕有蛋撻有牛肉麵有曲奇餅，同埋最新嘅叉燒。「終於都要玩到叉燒飯。前一晚用叉燒醬加玫瑰露酒加生抽加蒜蓉醃好梅頭肉。兩邊各220度焗15分鐘，搽蜜糖，攪掂。好似我咁作狀就梗係整埋蔥油同埋叉燒飯豉油啦！記住同豬肉檔嘅豬肉佬熟啲，佢先會比夠又肥又靚嘅梅頭肉俾你，如果唔係舊肉好似我咁瘦就唔好味啦。」賣相相當唔錯，占嫂真幸福。