帶大女行山抗疫 方媛上載愛心牛肉麵晒幸福

育有兩女的「城嫂」方媛依然容光煥發，身材Fit到爆，原來她專心湊女，打埋家頭細務同時，仲會keep住做運動，絕對唔許容自已變成黃面婆，肥師奶。今日她喺微博上載行山相，相中除她之外，仲有埋大女Chantelle（大寶），戴住粉紅色口罩嘅大寶更加正面出鏡，雖然只係露咗一雙精靈嘅眼仔，但束咗孖辮相當可愛，見她上衣、口罩、波鞋同背包都襯晒色，明顯經過大人幫她悉心打扮。至於方媛都戴晒口罩、空氣淨化機，同太陽眼鏡，喺疫情下有備而戰。縱使方媛同樣穿上牛仔褲同波鞋，因為由低角度影上去，她依然可以晒到一雙長腿，十分吸睛。

另外，方媛又上載咗抗疫生活圖片，早上享用由爸爸(郭富城)煮嘅愛心麥皮及牛肉麵，還晒幸福大讚住家男老公城城，留言說：「早餐爸爸煮的麵，太好吃，不夠我吃。」又，平日她會出去剪頭髮，再去超級市場掃大包朱古力、雪糕等零食。每晚都會同囡囡講故事，待囡囡休息後嘅私人時間會敷mask、睡前舉啞鈴及玩健身帶。