【頭條獨家】初次捧爸爸場煲劇 黃浩然爆囝囝迷上扮法證

黃浩然最近首度參與《法證》系列演出，在《法證先鋒IV》中飾演高級化驗師「高安」，該劇keep住有高收視，浩然覺得在疫情下帶給觀眾娛樂也覺安慰。原來這套劇亦是浩然兩個囝囝，8歲多的Kayden和6歲多的Ransley，第一次捧爸爸場煲劇，浩然仲自爆兩個仔已變《法證》粉絲，不單嫌每集太短，甚至會扮埋法證人員，相當搞笑。撰文：杜淑霞 攝影：梁志明 髮型：DY@Muse

劇集首周7天跨平台總收視35.7點，浩然最開心在疫情下幫到大家解悶，「最開心可以倍伴到香港巿民喺疫情裏面有啲娛樂同放鬆嘅機會。」講到首次跟鄭希怡合作，浩然竟然話因太熟有點影響，「我哋識咗好耐，但係正式合作係第一次，初頭都要搣甩望住佢笑㗎！因為真係太熟啦！都冇諗過點同佢演情侶。」幸好出來效果，浩然都覺滿意。

開心囝囝變粉絲
疫情下，浩然自爆兩個囝囝首度有機會捧爸爸場，「其實今次係兩小朋友第一次睇我嘅演出，咁耐冇乜睇過我嘅演出，今次《法證》兩個小朋友冇返學個幾月啦！要做功課、要放嘅電都做晒，佢哋就提議不如捧爸爸嘅場啦！不過有啲畫面同情節唔係太適合佢哋睇，我就同佢哋講明，唔啱睇嘅佢哋要瞌埋眼㗎！佢哋都話OK嘅。」點知兩個囝囝一睇即變鐵粉，「細仔就問點解咁快完㗎！應該做耐啲嘛！又話乜原來一集得4節，點解唔可以有5、6節㗎！我有一日瞓醒見大仔就戴住我出街嗰副有顏色嘅太陽眼鏡，揸住支電筒喺度周圍照喎！我一出嚟睇到，fans嚟喎！佢即刻會模仿囉！幾開心嘅，係幾特別嘅一樣嘢。」